Saturday, April 4, 2015

Saina Nehwal loses top spot after defeat in Malaysia Open semifinals

ಹೊಸದಿಲ್ಲಿ: ಮಲೇಷ್ಯಾ ಓಪನ್ ಸೂಪರ್ ಸೀರೀಸ್ ಬ್ಯಾಡ್ಮಿಂಟನ್ ಟೂರ್ನಿಯ ಮಹಿಳೆಯರ ಸೆಮಿಫೈನಲ್ಸ್‌ನಲ್ಲಿ ಸೋಲುವ ಮೂಲಕ ಸೈನಾ ನೆಹ್ವಾಲ್‌ ನಂ.1ರಿಂದ ಜಾರಿದ್ದಾರೆ. 

ವಿಶ್ವದ ನಂ.1 ಆಟಗಾರ್ತಿ ಎಂಬ ಹೆಗ್ಗಳಿಕೆ ಪಡೆದು ಟೂರ್ನಿಯಲ್ಲಿ ಆಟ ಆರಂಭಿಸಿದ್ದ ಭಾರತದ ಸೈನಾ ನೆಹವಾಲ್, ಬಿಡಬ್ಲ್ಯುಎಫ್ ವಿಶ್ವ ಸೂಪರ್ ಸೀರೀಸ್ ಮತ್ತು ಕಳೆದ ವಾರ ನಡೆದ ಇಂಡಿಯಾ ಸೂಪರ್ ಸೀರೀಸ್‌ನಿಂದ ಹೊರಗುಳಿದಿದ್ದ ಒಲಿಂಪಿಕ್ ಚಾಂಪಿಯನ್ ಲಿ ಕ್ಸುರುಯಿ ವಿರುದ್ಧ ಶನಿವಾರದ ಪಂದ್ಯದಲ್ಲಿ ಸೋಲು ಕಂಡಿದ್ದಾರೆ. 

ಟೂರ್ನಿಯಲ್ಲಿ ಅಗ್ರ ಶ್ರೇಯಾಂಕ ಹೊಂದಿದ್ದ ಚೀನೀ ಆಟಗಾರ್ತಿ ಲಿ ಕ್ಸುರುಯಿ, ಮೂರನೇ ಶ್ರೇಯಾಂಕಿತ ಭಾರತೀಯ ಆಟಗಾರ್ತಿ ಸೈನಾ ನೆಹವಾಲ್‌ರನ್ನು 13-21, 21-17, 22-20 ಅಂತರದಿಂದ ಸೋಲಿಸಿದರು. ಈ ರೋಮಾಂಚಕ ಕಾದಾಟ ಒಂದು ಗಂಟೆ ಮತ್ತು ಎಂಟು ನಿಮಿಷಗಳ ಕಾಲ ನಡೆಯಿತು. ತೀವ್ರ ಪೈಪೋಟಿ ನೀಡಿದರೂ ಚೀನೀ ಆಟಗಾರ್ತಿ ಮುಂದೆ ಗೆಲುವು ಸಾಧಿಸುವಲ್ಲಿ ಕೊನೆಕ್ಷಣದಲ್ಲಿ ಸೈನಾ ಎಡವಿದರು. 

ಲಿ ಕ್ಸುರುಯಿ ಹಾಗೂ ಸೈನಾ ನಡುವೆ ಈವರೆಗೆ ನಡೆದ 11 ಪಂದ್ಯಗಳಲ್ಲಿ ಚೀನೀ ಆಟಗಾರ್ತಿ 9ನೇ ಜಯ ಸಾಧಿಸಿರುವುದು ವಿಶೇಷ. ಸೈನಾ 2010ರ ಸಿಂಗಾಪುರ ಓಪನ್ ಮತ್ತು 2012ರ ಇಂಡೋನೇಷ್ಯಾ ಓಪನ್‌ನಲ್ಲಿ ಗೆಲುವು ಕಂಡಿದ್ದಾರೆ. ಈ ಗೆಲುವಿನ ಮೂಲಕ ಲಿ ಕ್ಸುರುಯಿ 80,764 ಅಂಕಗಳನ್ನು ಸಂಪಾದಿಸಿದ್ದು ವಿಶ್ವ ಶ್ರೇಯಾಂಕ ಪಟ್ಟಿಯಲ್ಲಿ ಮತ್ತೆ ಅಗ್ರಸ್ಥಾನಕ್ಕೇರಲಿದ್ದಾರೆ. 

ಉತ್ತಮ ಲಹರಿಯಲ್ಲಿರುವ ಸೈನಾ ಕಳೆದ ವರ್ಷ ಚೀನಾ ಓಪನ್ ಗೆದ್ದ ನಂತರ, ಸೈಯದ್ ಮೋದಿ ಗ್ರಾಂಡ್ ಪ್ರಿ ಗೋಲ್ಡ್ ಸರಣಿ ಗೆದ್ದಿದ್ದರು. ಬಳಿಕ ಆಲ್ ಇಂಗ್ಲೆಂಡ್ ಚಾಂಪಿಯನ್‌ಶಿಪ್‌ನ ಫೈನಲ್‌ಗೇರಿದ್ದರು. ಆ ನಂತರ ಇಂಡಿಯನ್‌ ಸೂಪರ್‌ ಸೀರಿಸ್‌ ಗೆದ್ದು ನಂ.1 ಪಟ್ಟಕ್ಕೇರಿದ್ದರು.